هوشیار ئه‌حمه‌دی
2010.12.07
"خۆپەسەندترین مرۆڤەکان ئەو کەسانەن کە چاویان بەڕووى چارەنووسى هاونیشتیمانەکانیاندا بەستووە". (ئەرەدى مەزن)
ئاخرین رۆژەکانى پاییز بوو، لە17ى سەرماوەزى ساڵى 1997، تیرۆریستان لەپیلانێکى تیرۆریستى دیکەدا، پۆلێک کادێرو پێشمەرگەى حیزبى دێمۆکراتى کوردستانى ئێرانیان دایە بەر رێژنەى گوللە و شەهیدیان کردن.
ئەوەى جێگاى داخە ئەوەیە کە ئەمجارەیان بەکرێگیراوانى کۆمارى ئیسلامى، خۆیان لە نێو بازگەکەدا حەشار دابوو و بە دەمامکى یەکیێتى نیشتیمانى کوردستانەوە دەرکەوتن.
ئەو کادێر و پێشمەرگانەى حیزبى دیمۆکرات دەهاتنەوە بۆ بارەگاى سەرەکى حیزب لە شارى کۆیە، کە لە "خەلەکان"، نزیک شارۆچکەى "دوکان" کەوتنە بۆسەى تیرۆریستانى " قەرارگاى رەمەزان"ی سوپاى پاسدارانەوە و هەر لە جێدا کادێرێکى سەرکردایەتى حیزب بە ناوى "مەنسوور فەتاحى" ناسراو بە "مەنسوورى رەشەهەورامى" کوژرا، ئەوانى دیکە بەرەو کۆیە دێن بەو مەبەستەى خۆیان بە بنکەکانى حیزب بگەیەننەوە، مخابن ئەوانیش لە بازگەکەى یەکێتى نیشتیمانى کوردستان دەدرێنە بەر دەستڕێژ و هەر چوارەکەیان دەکوژرێن کە بریتى دەبن لە1- مەنسوور ناسرى ئەندامى سەرکردایەتى 2- رەفعەت حوسەینى 3- یەدۆڵا شیرین سوخەن 4- ئەبوبەکر ناسراو بە "سامال"."
ئەوەش سەلمێنەرى ئەو راستییەیە کە دوژمنانى کورد بەردەوام لە هەوڵى ئەوەدا بوون سەنگەرەکانیان بگوازنەوە نێو ریزەکانى ئێمە و هاوکات لەگەڵ لێدانە جەستەییەکاندا، باندۆرى دەروونیشیان هەبێ. مخابن ئەوان تارادەیەکى باش سەرکەوتوو بوون، چونکى دەردەکەوێ تەنیا ئەرکى داڕشتنى لایەنى ستراتیژی پیلانەکان کەوتووەتە ئەستۆى ئەوان، ئەوى دیکە، هەر لە گەڵاڵەڕێژیى تاکتیکى، کۆکردنەوەى زانیاری، شۆفاری، ئامادەکاریى پێویست و پراکتیزەکردنى پلان و پیلانەکان سەرجەم لە ئەستۆى بەکرێگیراوانى خۆمان بووە.
بەو پێشەکییەوە کە باسمان کرد، لەکۆتایى هەشتاکان و دەهەى نەوەدەکاندا کۆمارى ئیسلامى بەستێنى تۆڕى تیرۆریستیى لە هەرێمى کوردستان ئامادە کرد و دانە و داوەکانى بەشێوازى جۆراوجۆر و لەرێگاى جیاجیاوە بڵاو کردەوە، بەڵام لەو پەیوەندییەدا لە ناوچەى ژێر دەسەڵاتى یەکیێتى نیشتیمانى کوردستان سەرکەوتنى زۆر زیاترى بەدەست هێنا، هەر بۆیە دەبینین لەو سەدان تیرۆرە سیاسییەى لە هەرێمى کوردستان کراوە، زۆربەى هەرە زۆرى لەو ناوچەیەدا بەڕێوە چوون. لەو پەیوەندییەدا بەشێک لەهێزە ئیسلامییەکانى باشوورى کوردستان لەوانە بزووتنەوەى ئیسلامى کوردستانى عێراقە کە بە رادەست کردنى حه‌وت کادیرو پێشمەرگەى حیزبى دێمۆکراتى کوردستانى ئێران بە ئیتلاعاتى کۆمارى ئیسلامى تاوانبارە.
ساڵانێکە راستییەکان لەپشت پەردەیەکى تاریکەوە شاردراونەتەوە، پەردەیەکى تەمومژاوى بەناوى بەرژەوەندیى نەتەوەیى؛ بەرژەوەندیىه‌کی نەتەوەیی کە هێشتا مەبەستەکەى بۆ کەس روون نییە. بەپێچەوانەوە، ئەوە پێى دەڵێن "قوفڵەوقوون" تێگەیشتن لە بەرژەوەندیى نەتەوەیى؛ ئەوەی کە لەو پەیوەندییەدا بە بەرژەوەندیى نەتەوەیى شوبهێنراوە، ئەوە خۆى هۆکارە بۆ شێوان و شێواندنى بەرژەوەندیی نەتەوەیى. کەوابوو بەرژەوەندیى نەتەوەیى لەوەدا نییە کە بە سەدان دایک و باوک و خوشک و براو ژن و منداڵى داخدار و جەرگسووتاو وەها بیر بکەنەوە کە خوێنى شەهیدان و قوربانییەکانیان دژ بە بەرژەوەندیى نەتەوەییە. ئایا مافى ئەوان نییە بپرسن، ئەدى ئەوە لە بەرژەوەندیى کێ دایە کە بکوژو تیرۆریستان ئێستا لەوپەڕى ئارامیدا دەژین؟ پشتگوێخستنى دۆسیەى ئەو قوربانیانەى ساڵانێکە مەلەفەکانیان لە ئه‌رشیڤەکانى ئاسایشدا تەپوتۆز دەخۆن، لە قازانجى کێ دایە؟ کێ وەڵامدەر و بەرپرسیارە بەرامبەر خوێنى بە ناحەق ڕژاوى ئەو سەدان قوربانییەى دەستى تیرۆر لەم هەرێمە؟ کەسوکارى قوربانییەکان دەبێ هانا بۆ کێ بەرن و بەرۆکى کێ بگرن؟ وەزارەتى داد و دروشمى دادوەریى لێرەدا چ رۆڵێک دەگێڕێ؟ ئەوانەو دەیان پرسیارى دیکە دەورى تەنیوین، بەڵام سەرەڕاى ئەوەى کە ئێستا هەرێمى کوردستان لە هەموو بوارەکاندا شانازى بەخۆیەوە دەکات و خۆى بە ترۆپکی ئاسایش و ئەزموونى دێمۆکراسى ناوچەکە دەزانێ، کەچى گوێ خۆى لە بەرامبەر ئەو پرسیارانەدا ئاخنیوە.
هەرچى حیزبى دێمۆکراتى کوردستانى ئێرانیشە، بەردەوام وەڵامى پرسیارەکانى گەڕاندووەتەوە بۆ پاراستنى پرستیژى میوان بوون و لەبەرچاوگرتنى هەلومەرجى نالەبار و بەرژەوەندیى نەتەوەیى، ئەو وەڵامانە تا چەندە لۆجیکین و تا چ رادەیەک خاوەن پرسیارەکان بە قەناعەت دەگەیەنن ئەوە شتێکى دیکەیە. بەڵام ئەوەى راستى بێ ئەوەیە کە ئەو دۆسیانە ئەمڕۆ بێ یان سبەى، هەر دەبێ بکەونەوە گەڕ؛ ئەوە هەم بە قازانجى ئاسایشى هەرێمە و هەم لە بەرژەوەندیى گشتى و نەتەوەییش دایە. بۆ بە قازانجى هەرێم؟ چونکى ئەوانە چ خەڵکى رۆژهەڵات بن یان خەڵکى باشوور، لاى کۆمارى ئیسلامى فایل و مەلەفى رەنگاوڕەنگیان هەیە و بەو ئاسانییە رزگاریان نابێ لە دەست کۆنە ئەربابەکەیان، بەڵکوو لە هەلومەرجە جۆراوجۆرەکاندا تەنیا گۆڕان بە سەر پێ‌ئەسپێردراو (ماموریت)ەکانیاندا دێت. کەوابوو ئەوانە هەروا لێرە رۆڵى دەست و پێ و چاو و گوێی دوژمن دەبینن. بۆ لە بەرژەوەندى گشتى دان؟ چونکى خەڵکى پارچەکانى دیکەى نیشتیمانە دابەشکراوەکەمان چاوى هیوایان بڕیوەتە هەرێمى کوردستان و بە چاوى لانکى ئازادى کوردستان، سەیرى دەکەن، ئەوان بەرژەوەندیى نەتەوەیى بەرینتر لەوە دەبینن کە بە راپێچکردنى کۆمەڵێک تاوانبار و تیرۆریست بۆ بەردەم بارەگاى داد و دادپەروەرى، بکەوێتە لەرزە، بەڵکوو بەو کارە ئەوە بەرژەوەندى دوژمنانە دەکەوێتە مەترسى. کەوابوو با چیدى بەرژەوەندى دوژمنان لە بابۆڵەى بەرژەوەندى نەتەوەییدا، دەرخواردى خەڵک و کۆمەڵگا و نەتەوەکەمان نەدەین!
باشتر وایە لایەنە پەیوەندى دارەکان لە هەرێمى کوردستان ئاوڕێکى جیدى لەو دۆسیەیە بدەنەوە کە تیرۆر کرانى زیاتر لە 300 کەس لە چالاکانى سیاسی رۆژهەڵاتى کوردستان لە سەرکردایەتى حیزبەکان، کادێر و پێشمەرگە، ئەندام و لایەنگر و دۆستان و دانیشتوان و کەسایەتییە سیاسییەکان لەخۆ دەگرێ، چونکى دوور نییە لە داهاتوودا ئەو کارە ببێتە ئامانجى کەمپەینێکى بەرین، ئەوکاتە ئیدى بەرژەوەندییەکانى هەرێمى کوردستانیش لە بەرامبەر بەرژەوەندییە گشتی و نەتەوەییەکانى گەلى کورددا گارانتى ناکرێن.
ـــــــــــــــــــــــــــــــــــــــــــــــــــــــ
تێبینییەکان:
1 ـ ئەو بابەتە بابەتێکى رۆژنامەوانى سەربەخۆیە بە کۆمەڵێک ئامانجى نەتەوەیى و نیشتیمانییەوە.
2ـ بێگومان هەر لە ئێستاوە دەکەومە ژێر زەڕەبین، من باکم نییە، بەڵام هەڵەیە گەر پێمان وابێ بە بێ دەنگکردنى قەڵەمێک، کۆگایەک لە تاوان پووشبەسەر دەکرێ، ئەمە سەرەتاى کارە.
Hoshyar_de@yahoo.com
هیچ نظری موجود نیست:
ارسال یک نظر